თსსუ-ში ემორის უნივერსიტეტის ასისტენტ პროფესორმა ქეთევან კობაიძემ საჯარო ლექცია გამართა

2017 წლის 5 ივლისს 15:00 საათზე ემორის უნივერსიტეტის სამედიცინო სკოლის ასისტენტ პროფესორმა ქეთევან კობაიძემ თბილისის სახელმწიფო სამედიცინო უნივერსიტეტში ლექცია წაიკითხა თემაზე „საინტერესო შემთხვევები მედიცინიდან - დაავადებათა კონტროლისა და საზოგადოებრივი ჯანმრთელობის ცენტრის გამოცდილების ჭრილში“ (დიფტერიის ეპიდ.აფეთქება, ბოტულიზმი, ციმბირის წყლული და სხვა).
ქეთევან კობაიძემ დიპლომირებული მედიკოსის ხარისხი თბილისის სახელმწიფო სამედიცინო უნივერსიტეტში მიიღო. იგი, ასევე, ფლობს მედიცინის დოქტორის ხარისხს იმუნოლოგიასა და ალერგოლოგიაში. მისი სადოქტორო ნაშრომი B ჰეპატიტის იმუნოლოგიას ეძღვნება. 
ქეთევან კობაიძე 1995 წლიდან მუშაობდა საქართველოს დაავადებათა კონტროლისა და პრევენციის ცენტრის (NCDC) დიფტერიის ეპიდემიოლოგიის მიმართულების დირექტორად,სწორედ აქ მიიღო მან მიწვევა აშშ-ის დაავადებათა კონტროლისა და პრევენციის ცენტრიდან,სადაც 2001 წლამდე განაგრძობდა მუშაობას. მან სტაჟირება დაასრულა მერჩერის უნივერსიტეტის მედიცინის სკოლაში. ამავე დროს, ქეთევან კობაიძემ 2006 წელს დაამთავრა რეზიდენტურა შინაგან მედიცინაში ატლანტის სამედიცინო ცენტრში.

ემორის უნივერსიტეტის მედიცინის სკოლის ქართველმა პროფესორმა 2011 და 2016 წლებში მიიღო ემორის უნივერსიტეტის მედიცინის სკოლის ჯილდო – Golden Apple Teaching Award. იგი ჩართულია მრავალ კლინიკურ და სამეცნიერო კვლევაში, გამოქვეყნებული აქვს მრავალი სამეცნიერო პუბლიკაცია. ემორის უნივერსიტეტის ქართველი პროფესორი ეწევა ძალზე ინტენსიურ სასწავლო და კლინიკურ საქმიანობას და აქტიურად მონაწილეობს ემორის უნივერსიტეტის მედიცინის პროგრამის სტუდენტებისა და რეზიდენტების სწავლებაში.

თსსუ-ში ქეთევან კობაიძის საჯარო ლექცია უნივერსიტეტის, თსსუ-ის პროფესორებთან და ამერიკული პროგრამის სტუდენტებტან დისკუსიით, საინტერესო კითხვა-პასუხით დასრულდა. ემორის უნივერსიტეტის წარმატებულმა ქართველმა ასისტენტ პროფესორმა აუდიტორიას სხვადასხვა საკითხში საკუთარი გამოცდილება გაუზიარა. 
დიპლომირებული მედიკოსის ამერიკული პროგრამის ადმინისტრაცია მადლობას უხდის ქეთევან კობაიძეს თანადგომისთვის!