PITCH TO MATCH 2024

თსსუ-ის დიპლომირებული მედიკოსის ამერიკულმა პროგრამამ ცოტა ხნის წინ ახალ პროექტს ჩაუყარა საფუძველი - „Pitch to Match Night". ღონისძიების ფარგლებში,სტუდენტებს საშუალება მიეცათ, ფართო აუდიტორიის წინაშე წარედგინათ საკუთარი შემოქმედებითი პროექტები, რაც ერთი მხრივ, შეუწყობს ხელს სამედიცინო საზოგადოებასთან მათ კომუნიკაციას, მეორე მხრივ კი წაახალისებს სამედიცინო სფეროს მომავალ ლიდერებს.

„Pitch to Match 2024“ -ის პირველი ღონისძიება გაიხსნა დიპლომირებული მედიკოსის ამერიკული პროგრამის დირექტორის, ასოცირებული პროფესორის, ეკა ეკალაძის და პროექტის ხელმძღვანელის, ასოცირებული პროფესორის, ნონა ჯანიკაშვილის მისასალმებელი სიტყვებით.

ღონისძიებას დაესწრო სამედიცინო სფეროს გამორჩეული საზოგადოება, მოქმედი ექიმები, თსსუ-ის პროფესორ-მასწავლებლები, მათ შორის თსსუ-ის რექტორი, პროფესორი ირაკლი ნატროშვილი, რომელმაც სიტყვით მიმართა სტუდენტებს, სტუმრებს და ხაზი გაუსვა ინოვაციების მნიშვნელობას სამედიცინო განათლებისა და ჯანდაცვის სფეროებში.

სტუდენტების პრეზენტაციები მოიცავდა ისეთ თემებს, როგორიცაა ფსიქიკური ჯანმრთელობა და სოციალური მხარდაჭერა, დიაგნოსტიკური ინოვაცია, პროგნოზი და რისკების შეფასება, ტელემედიცინა და პაციენტების ჩართულობა, ჯანდაცვის სისტემის ეფექტურობა, ქრონიკული დაავადებები და სხვა.

ღონისძიება დასრულდა საკომუნიკაციო სესიით, რომელმაც მონაწილე სტუდენტებს პრეზენტაციისშემდგომი დიალოგისა და კავშირების დამყარების შესაძლებლობა მისცა.

ამიერიდან Pitch to Match Night-ი დიპლომირებული მედიკოსის ამერიკული პროგრამის ყოველწლიური ტრადიცია იქნება, რაც საშუალებას მისცემს სტუდენტებს, შეისწავლონ და გაუზიარონ საზოგადოებას ის ტრანსფორმაციული იდეები, რომლებსაც აქვთ მედიცინის სფეროს გაუმჯობესების პოტენციალი.