ტრადიციული თეთრი ხალათების ცერემონიალი 2024
კომენტარი (0) გაზიარება (0)

2024 წლის 15 ნოემბერს, თსსუ-ში დიპლომირებული მედიკოსის ამერიკული პროგრამის ტრადიციული თეთრი ხალათების ცერემონია გაიმართა, რასაც პროგრამის პირველი სემესტრის სტუდენტებისთვის განსაკუთრებული დატვირთვა აქვს.

 მედიცინის ფაკულტეტის სტუდენტებისთვის თეთრი ხალათი წარმატებული სამედიცინო კარიერისა და ექიმის შეუბღალავი ავტორიტეტის სიმბოლოს წარმოადგენს. სტუდენტების თეთრი ხალათებით შემოსვა იმ ვალდებულების გამოხატულებაა, რასაც მათი პროფესიული საქმიანობა მოიცავს: თანაგრძნობა, თანამშრომლობა და მეცნიერულად დასაბუთებული ზრუნვა ადამიანებზე სამედიცინო კარიერაში მოგზაურობის პირველივე დღიდან.

2030 წლის გამოსაშვები კურსის თეთრი ხალათების ცერემონიას უძღვებოდა ემორის უნივერსიტეტის მედიცინის სკოლის საგანმანათლებლო პროგრამების დირექტორი, არჩილ უნდილაშვილი. პირველსემესტრელებსა და აუდიტორიას სიტყვით მიმართეს თსსუ-ის რექტორმა, პროფესორმა ირაკლი ნატროშვილმა, დიპლომირებული მედიკოსის ამერიკული პროგრამის დირექტორმა, ასოცირებულმა პროფესორმა ეკა ეკალაძემ, პროგრამის ხელმძღვანელმა, პროფესორმა რიმა ბერიაშვილმა და მე-6 კურსის სტუდენტმა, ნანა გონჯილაშვილმა. 

ღონისძიების ერთ-ერთი მნიშვნელოვან ნაწილს პროგრამის დაჯილდოვების ტრადიციული ცერემონია წარმოადგენდა. დიპლომირებული მედიკოსის ამერიკული პროგრამის წარმატებაში გაწეული განსაკუთრებული ძალისხმევისათვის ყოველწლიური ჯილდო გადაეცემა  აკადემიურ თუ კლინიკურ პერსონალს ან გუნდს და პარტნიორ ორგანიზაციას.\


•  წელს „ერთობლივი მუშაობისა და პარტნიორობის” პრიზი გადაეცა ორგანიზაციას „ევროპა დონნა საქართველო“;
• სპეციალური მადლობის პრიზები გადაეცათ პედიატრიის, შინაგანი მედიცინისა და ქირურგიის კლერკშიფების წარმომადგენლებს მათი უზადო შრომისთვის, რაც ხელს უწყობს პროგრამის ყოველწლიურ წინსვლას.

დაჯილდოვების შემდეგ, ფაკულტეტის წევრებმა და სტუმრებმა, პირველსემესტრელი სტუდენტები ოფიციალურად შემოსეს თეთრი ხალათებით და მიულოცეს სამედიცინო სფეროსა და საზოგადოებაში შესვლა. ცერემონია დასრულდა ფიცის დადებით, რომელსაც უძღვებოდა ასოცირებული პროფესორი ეკა ეკალაძე.


თეთრი ხალათების დასამახსოვრებელი ცერემონია, ასევე, გამოხატავს თსსუ-სა და ემორის უნივერსიტეტის მედიცინის სკოლას შორის მტკიცე თანამშრომლობას და ხაზს უსვამს დიპლომირებული მედიკოსის ამერიკული პროგრამის ვალდებულებას, მიაწოდოს სტუდენტებს აშშ-ის სტანდარტების შესაბამისი სამედიცინო განათლება.