განათლებისა და მეცნიერების მინისტრმა თსსუ-ის მეორე სასწავლო კორპუსი გახსნა

 საქართველოს განათლებისა და მეცნიერების მინისტრმა გიორგი ამილახვარმა თბილისის საელმწიფო სამედიცინო უნივერსიტეტის მეორე სასწავლო კორპუსი გახსნა. თსსუ-ის ადმინისტრაციასთან ერთად მინისტრმა დაათვალიერა განახლებული ისტორიული შენობა, რომელსაც რეაბილიტაცია თანამედროვე სტანდარტების შესაბამის ჩაუტარდა, ამასთან აღიჭურვა უახლესი ლაბორატორიებით, ტექნიკით, საკონფერენციო სივრცეებითა და აუდიტორიებით.

 მეორე სასწავლო კორპუსში ვიზიტის ფარგელებში, საქართველოს განათლებისა და მეცნიერების მინისტრი გიორგი ამილახვარი დიპლომირებული მედიკოსის ამერიკული პროგრამის გუნდსაც შეხვდა. პროგრამის დირექტორმა, ასოცირებულმა პროფესორმა ეკა ეკალაძემ მინისტრს გააცნო პროგრამის სპეციფიკა, ესაუბრა ემორის უნივერსიტეტის მედიცინის სკოლასთან (აშშ, ატლანტა) მრავალწლიან ურთიერთობაზე, ამერიკული მხარის ჩართულობასა და როლზე პროგრამის შემუშავებასა და განვითარებაში, სტუდენტებისა და კურსდამთავრებულების მიღწევებზე ამერიკის შეერთებული შტატების სამედიცინო ლიცენზირების გამოცდებსა (USMLE) და აშშ რეზიდენტურაში.

 ვიზიტის დროს მინისტრი ადგილზე გაეცნო თსსუ-ის დიპლომირებული მედიკოსის ამერიკული პროგრამის სასწავლო პროცესით გათვალისწინებულ მიმდინარე პრაქტიკულ აქტივობებს: კურსის - ,,გახდი ექიმი“- ფარგლებში მეხუთე სემესტრის სტუდენტებისთვის სიმულირებული პაციენტის მონაწილეობით სასუნთქი სისტემის ფიზიკალურ გასინჯვას, ქირურგიული კერვის პრაქტიკულ მეცადინეობას,  სიმულაციურ ტრენინგს - „სიცოცხლის გადარჩენის ბაზისური ალგორითმი“ (BLS - Basic Life Support), რომელიც, პირველსემესტრელ სტუდენტებთან საორიენტაციო შეხვედრების ფარგლებში, უფროსკურსელების მიერ ორგანიზებული აქტივობაა.

 ახალ 2023-2024 სასწავლო წელს თსსუ-ის დიპლომირებული მედიკოსის ამერიკული პროგრამა უნივერსიტეტის განახლებულ, მეორე სასწავლო კორპუსში შეხვდა.