დედამიწის დღე

 თბილისის სახელმწიფო სამედიცინო უნივერსიტეტის ინიციატივით, გარემოს დაცვითი კვირეულის ფარგლებში  2017 წლის 26 აპრილს დასუფთავების აქცია გაიმართა. დიპლომირებული მედიკოსის ამეირკული პროგრამის სტუდენტებმა თსსუ-ის რექტორთან, პროფესორ ზურაბ ვადაჭკორიასთან, უნივერსიტეტის ადმინისტრაციის წევრებთან და სხვადასხვა ფაკულტეტის სტუდენტებთან ერთად აქციის ფარგლებში დაგეგმილ სხვადასხვა აქტივობაში მიიღეს მონაწილეობა. მათ ადმინისტრაციული კორპუსის ტერიტორია დაასუფთავეს, ნაგვის ნარჩენები შეაგროვეს, ასევე სპეციალური ხსნარით ხეები შეათეთრეს და მცენარეები დარგეს. დასუფთავების აქცია გარემოს დაცვითი კვირეულის „სუფთად ევროპისკენ“ ფარგლებში გაიმართა, რომელიც გარემოს დაცვის სამინისტროს ორგანიზებით საქართველოს სხვადასხვა რეგიონში მიმდინარეობს.

ზურაბ ვადაჭკორია (რექტორი, პროფესორი): „მსგავს აქციას უნივერსიტეტი პერიოდულად ატარებს მის დაქვემდებარებაში არსებული 5 კლინიკისა და სასწავლო კორპუსების მიმდებარე ტერიტრიებზე. უნდა ამაღლდეს თითოეული ჩვენგანის თვითშეგნება, რადგან სუფთა გარემო, უპირველეს ყოვლისა, ჩვენი ჯანმრთელობისთვის არის საჭირო. თანაც, ტურისტული სეზონი მოდის და ქვეყანაში უფრო მეტი ტურისტი ჩამოვა. ვფიქრობ, უნდა მივხედოთ ჩვენს გარემოს და დავასუფთაოთ“.

მარიამ ფესტვენიძე (დიპლომირებული მედიკოსის ამერიკული პროგრამის სტუდენტი, კლასი 2022): „ადამიანი და გარემო განუყოფელია. გარემო პირდაპირ გავლენას ახდენს ჩვენს ცხოვრებაზე, ჯანმრთელობაზე ... ჩვენი, სტუდენტების, ვალია დავიცვათ ბუნება და შევუნარჩუნოთ ის მომავალ თაობას. მსგავსი ტიპის აქციები ზრდის ცნობიერების დონეს და კიდევ ერთხელ გვახსენებს, რამდენად მნიშვნელოვანია ბუნების შენარჩუნება".

ანა გოგოლაშვილი (დიპლომირებული მედიკოსის ამერიკული პროგრამის სტუდენტი, კლასი 2022): „გუშინ დედამიწის საერთაშორისო დღე აღვნიშნეთ. ბოლო დროს დიდი ეკოლოგიური პრობლემების წინაშე დავდექით. ჩვენ, დიპლომირებული მედიკოსის ამერიკული პროგრამის სტუდენტებმა, ვცადეთ, ჩვენი წვლილი შეგვეტანა უნივერსიტეტის ადმინისტრაციული შენობის გარემოს მოვლაში. მოხარული ვარ, რომ მსგავსი ტიპის აქციები უფრო და უფრო ხშირ სახეს იღებს, რაშიც მომავალშიც დიდი სიამოვნებით ჩავერთვებით".