ვიზიტი სკოლა „მოძღვარში"

დიპლომირებული მედიკოსის ამერიკული პროგრამა 7 აპრილს დამოუკიდებელ სკოლა „მოძღვარს" სტუმრობდა. ვიზიტის მიზანი სკოლის დამამთავრებელი კლასების მოსწავლეებისთვის, მედიცინის მიმართულებით სწავლის გაგრძელების მსურველი აბიტურიენტებისთვის, დიპლომირებული მედიკოსის ამერიკული პროგრამის შესახებ ინფორმაციის მიწოდება გახლდათ.

პროგრამის წარმომადგენლებისგან მოსწავლეებმა დაწვრილებითი ინფორმაცია მიიღეს სასწავლო სისტემისა და ყველა იმ შესაძლებლობის შესახებ, რომელსაც მათ American MD Program აძლევს. პრეზენტაციის შემდეგ დილომირებული მედიკოსის ამერიკული პროგრამის მეორე კურსის სტუდენტებმა მოსწავლეებისთვის პირველადი დახმარების ტრენინგი ჩაატარეს. ლიზა თოფურიამ, ფიბი მადუსუდანანმა და მარიამ ჭელიძემ თანატოლებს აუხსნეს, როგორ დაასტაბილურონ ადამიანის ჯანმრთელობის მდგომარეობა მანამ, ვიდრე შემთხვევის ადგილზე სასწრაფო დახმარების ბრიგადა მივა. პირველადი დახმარების ტრენინგის პრაქტიკულ ნაწილში მოსწავლეები სიამოვნებით ჩაერთვნენ. მათ გულ-ფილტვის არაპირდაპირი მასაჟი (CPR), ამერიკული პროგრამის სტუდენტებისა და წარმომადგენლების ინსტრუქციით, სამედიცინო სასწავლო მანეკენებზე თავად ჩაატარეს და მათთვის საინტერესო სხვადასხვა შემთხვევის დროს პირველადი დახმარების გაწევის შესახებ ინფორმაცია მიიღეს.

თბილისის სახელმწიფო სამედიცინო უნივერსიტეტის დიპლომირებული მედიკოსის ამერიკული პროგრამის ეგიდით მგავსი ტიპის ვიზიტები საქართველოს სხვადასხვა სკოლებში გრძელდება.