თბილისის სახელმწიფო სამედიცინო უნივერსიტეტში სასწავლო წლის საზეიმო გახსნა

დიპლომირებული მედიკოსის ქართულ-ამერიკული პროგრამის 2015-2016 სასწავლო წელი დაიწყო თბილისის სახელმწიფო სამედიცინო უნივერსიტეტში 2015-2016 სასწავლო წელი 19 სექტემბერს საზეიმოდ გაიხსნა. სტუდენტებს სასწავლო წლის დაწყება უნივერსიტეტის რექტორმა, პროფესორმა ზურაბ ვადაჭკორიამ, საქართველოს განათლებისა და მეცნიერების მინისტრმა ალექსანდრე ჯეჯელავამ, საქართველოს შრომის, ჯანმრთელობის და სოციალური დაცვის მინისტრის მოადგილემ ვალერი კვარაცხელიამ, საქართველოს დაავადებათა კონტროლის ეროვნული ცენტრის გენერალური დირექტორმა ამირან გამყრელიძემ და უნივერსიტეტის საპატიო სტუმრებმა და პროფესორებმა მიულოცეს. სასწავლო წლის დაწყება და ცხოვრების ახალ ეტაპზე გადასვლა მიულოცა სტუდენტებს ემორის უნივერსიტეტის (აშშ, ატლანტა) პროფესორმა, საქართველოსა და თბილისის საპატიო მოქალაქემ, კენეტ ვოლკერმა და ემორის უნივერსიტეტის საგანმანათლებლო პროგრამების დირექტორმა არჩილ უნდილაშვილმა. სტუდენტებს, მათ შორის, განსაკუთრებულად - პირველსემესტრელებს ახალი სასწავლო წლის დაწყება მიულოცა რექტორმა, პროფესორმა ზურაბ ვადაჭკორიამ: – „მადლობას გიხდით, რომ აირჩიეთ ჩვენი უნივერსიტეტი. აქ, უმდიდრეს ტრადიციებზე და გამოცდილებაზე დაყრდნობით, მიიღებთ ცოდნას, რაც მომავალში თქვენი წარმატებული პროფესიული საქმიანობისა და ნათელი მომავლისკენ წინსვლის საწინდარი იქნება. თქვენთვის ეს ახალი ცხოვრების დასაწყისია და ამიტომაც მსურს, თბილისის სახელმწიფო სამედიცინო უნივერსიტეტის სახელით, განსაკუთრებით მოგესალმოთ და წარმატებები გისურვოთ ახალ სარბიელზე“. პირველსემესტრელებს მიმართა საქართველოს განათლებისა და მეცნიერების მინისტრმა ალექსანდრე ჯეჯელავამ: – „თქვენ სწავლობთ ძალიან გამორჩეულ, ძალიან ღირსეულ და საინტერესო სასწავლო დაწესებულებაში – თბილისის სახელმწიფო სამედიცინო უნივერსიტეტში, თქვენ ხართ გმირები, რომ აირჩიეთ ყველაზე ღირსეული და საჭირო პროფესია ჩვენი ქვეყნისთვის და თქვენ ხართ ყველაზე ნიჭიერები“, ­­_ აღნიშნა მან. სტუდენტებს მიესალმნენ: ქალაქის მერი დავით ნარმანია, საქართველოს შრომის, ჯანმრთელობის და სოციალური დაცვის მინისტრის მოადგილე ვალერი კვარაცხელია, საქართველოს დაავადებათა კონტროლის ეროვნული ცენტრის გენერალური დირექტორი ამირან გამყრელიძე, პროფესორი კენეტ ვოლკერი, უცხოელი პროფესორები... ღონისძიების დასასრულს, ათი ყველაზე მაღალი რეიტინგის მქონე პირველსემესტრელი, მათ შორის დიპლომირებული მედიკოსის ამერიკულ პროგრამაზე ჩარიცხული სტუდენტები, თსსუ–ის სტუდენტური თვითმმართველობის პრეზიდენტმა, გიორგი საღინაძემ დააჯილდოვა. საზეიმო შეხვედრაზე შესრულდა საქართველოსა და თბილისის სახელმწიფო სამედიცინო უნივერსიტეტის ჰიმნები. სტუდენტებმა მომავალი წინსვლისა და ოცნებების ასრულების ნიშნად ცაში ცისფერი და თეთრი ბუშტები გაუშვეს. ღონისძიების დასრულების შემდეგ დიპლომირებული მედიკოსის ამერიკული პროგრამის პირველი სემესტრის სტუდენტები ფაკულტეტის ხელმძღვანელ პირებსა და პროფესორებს შეხვდნენ, ისაუბრეს სასწავლო პროცესისა და მომავალი პროფესიის შესახებ.