კვლევების პოსტერების კონფერენცია 2023

თსსუ-ში 5 დეკემბერს დიპლომირებული მედიკოსის ამერიკული პროგრამის სტუდენტების კვლევების პოსტერების კონფერენცია გაიმართა.

კონფერენცია ყოველწლიურია და წარმოადგენს საჯარო კომუნიკაციას ორიგინალური კვლევების შესახებ და მას ამერიკული პროგრამის მე-11 სემესტრის სტუდენტები აღმოჩენის ფაზის კურსის ფარგლებში ამზადებენ. სტუდენტების კოორდინატორია აღმოჩენის ფაზის კურსის ხელმძღვანელი, ასოცირებული პროფესორი ნონა ჯანიკაშვილი.

მე-11 სემესტრის სტუდენტების სამეცნიერო კვლევის შედეგები კონფერენციაზე, აუდიტორიის წინაშე წარმოდგენილია პოსტერებისა და მოკლე მოხსენებების სახით. ღონისძიება მნიშვნელოვანია პროგრამის დანარჩენი სტუდენტებისათვის, რომლებიც კვლევის პროცესში ჩართული უფროსი თანატოლების გამოცდილებას იზიარებენ და ეცნობიან ფაკულტეტის წარმომადგენლებისა და კლინიცისტების, ექიმების შეფასებებს.

სამედიცინო და საგანმანათლებლო საზოგადოებასთან ერთად კვლევითი პოსტერების კონფერენციას თსსუ-ში ესწრებოდა ემორის უნივერსიტეტის მედიცინის სკოლის ასისტენტ-დეკანი, პროფესორი გორდონ ჩერჩვორდი და საქართველოს განათლებისა და მეცნიერების მინისტრის მოადგილე, ბატონი ნოდარ პაპუკაშვილი, რომელმაც სიტყვით მიმართა კონფერენციაზე შეკრებილ საზოგადოებას და აღნიშნა, რომ თსსუ-ის დიპლომირებული მედიკოსის ამერიკული პროგრამა ხარისხიანი განათლების საუკეთესო მაგალითია: „თბილისის სახელმწიფო სამედიცინო უნივერსიტეტი თავისი ასწლიანი ისტორიით არა მხოლოდ საქართველოსთვის, არამედ მთელი რეგიონისთვის აკეთებს იმ საქმეს, რასაც განათლების და მეცნიერების სამინისტრო მხარს უჭერს ინტერნაციონალიზაციის განვითარების კუთხით. დიპლომირებული მედიკოსის ამერიკული პროგრამა არის საუკეთესო და წარმატებული მაგალითი, როგორ უნდა მისცე ხარისხიანი სამედიცინო განათლება სტუდენტს. დღეს გავეცანით ამ პროგრამის ფარგლებში განხორციელებულ ძალიან მნიშვნელოვან კვლევებს. ასეთ პროექტებს მუდმივად ექნება დიდი მხარდაჭერა საქართველოს განათლებისა და მეცნიერების სამინისტროს მხრიდან“.

თსსუ-ის დიპლომირებული მედიკოსის ამერიკული პროგრამის სტუდენტებმა კონფერენციაზე 15 კვლევითი პოსტერი წარმოადგინეს.

სტუდენტების პროექტები ექიმებმა და პროფესორებმა შეაფასეს. კონფერენციის დასასრულს, საუკეთესო პოსტერისა და მოკლე მოხსენების ავტორები გამოვლინდნენ. მათ სამახსოვრო პრიზები გადაეცათ:

საუკეთესო პოსტერი - „ექოკარდიოგრაფიული მაჩვენებლები, რომლებიც ასოცირდება ინტრადიალიზურ წონის მატებასთან, პაციენტებში რომლებიც იტარებენ ჰემოდიალიზის მკურნალობას საქართველოში. (ექოდიალი)" - რ. პარაბ, ბ. შმიდტ, ჯ. როსე, ს. ჯაიად;

საუკეთესო მოკლე მოხსენება - „ასოციაცია ანემიასა და პარათიროიდულ ჰორმონს შორის თირკმლის უკმაროსობის მქონე პაციენტებში, რომლებიც გადიან ჰემოდიალიზის მკურნალობას საქართველოში. (პარა-ლიზი)"- ე. შავგულიძე, გ. ჯაჭვაძე, ა ბაიგ, კ. მენნამბათჰ.